Opportunitajiet ewlenin ta’ finanzjament
Appoġġ ekonomiku, soċjali u territorjali
Il-Politika ta’ koeżjoni (jew il-politika reġjonali) tappoġġja l-koeżjoni ekonomika, soċjali u territorjali f’reġjuni li jikkwalifikaw għall-finanzjament.
Il-Fondi Strutturali u ta’ Investiment Ewropej jirreferu għall-5 fondi ewlenin li jikkombinaw bejniethom sabiex jappoġġjaw l-iżvilupp ekonomiku fil-pajjiżi kollha tal-UE:
- il-Fond Ewropew tal-Iżvilupp Reġjonali (FEŻR)
- il-Fond Soċjali Ewropew (FSE)
- il-Fond ta’ Koeżjoni (FK)
- il-Fond Agrikolu Ewropew għall-Iżvilupp Rurali (FAEŻR)
- il-Fond Ewropew għall-Affarijiet Marittimi u s-Sajd (FEMS)
Ir-reġjuni kollha tal-UE jistgħu jibbenefikaw mill-FEŻR u l-FSE. Il-FK qiegħed għal reġjuni inqas żviluppati.
Proġetti infrastrutturali ewlenin
JASPERS huwa strument ta' assistenza teknika speċjali li ġie żviluppat b’mod konġunt mill-Kummissjoni Ewropea, mill-grupp tal-Bank Ewropew tal-Investiment u minn istituzzjonijiet finanzjarji oħrajn.
Huwa jassisti lill-amministrazzjonijiet pubbliċi fit-tħejjija ta’ proġetti kbar li jistgħu jiġu kofinanzjati mill-fondi tal-UE u jgħin lill-ibliet u r-reġjuni jassorbu l-fondi Ewropej permezz ta’ proġetti tal-ogħla kwalità.
Servizzi ta’ konsulenza dwar strumenti finanzjarji
fi-compass huwa strument ta' assistenza teknika speċjali li ġie żviluppat b’mod konġunt mill-Kummissjoni Ewropea, mill-grupp tal-Bank Ewropew tal-Investiment u minn istituzzjonijiet finanzjarji oħrajn. Huwa pjattaforma għal servizzi ta’ konsulenza dwar strumenti finanzjarji fil-Fondi Strutturali u ta’ Investiment Ewropej (FSIE) u l-mikrofinanzjament fil-Programm tal-Unjoni Ewropea għall-Impjiegi u l-Innovazzjoni Soċjali (EaSI).
Opportunitajiet oħrajn ta’ finanzjament
- Il-korpi pubbliċi jista’ jkollhom aċċess għall-finanzjament permezz ta’ programmi ġodda bħall-Faċilità għall-Irkupru u r-Reżiljenza u l-programm tas-Saħħa (l-UE għas-Saħħa)
- L-Inizjattiva favur l-Impjiegi taż-Żgħażagħ tappoġġja ż-żgħażagħ bla xogħol li mhumiex fl-edukazzjoni jew f’taħriġ f’reġjuni b’rata tal-qgħad fost iż-żgħażagħ ogħla minn 25%. Għall-perjodu 2021-2027, l-Inizjattiva favur l-Impjieg taż-Żgħażagħ ġiet integrata fil-Fond Soċjali Ewropew Plus (FSE+), filwaqt li ppreservat il-fokus fuq l-impjiegi taż-żgħażagħ.
- Jekk ikun involut fil-biedja, korp pubbliku jista’ jkun eliġibbli għal pagament dirett taħt il-Fond Agrikolu Ewropew ta’ Garanzija (FAEG). Il-finanzjament mill-FAEG jista’ jingħata wkoll lil korpi pubbliċi involuti fl-Iskema tal-iskejjel tal-frott, il-ħaxix u l-ħalib u fil-Promozzjoni ta’ prodotti tal-biedja tal-UE fl-UE u f’pajjiżi terzi.
- Skont il-prijoritajiet tal-pajjiż jew tar-reġjun inkwistjoni, korp pubbliku f’żona rurali jista’ jkun eliġibbli għall-finanzjament taħt il-Fond Agrikolu Ewropew għall-Iżvilupp Rurali (FAEŻR) jekk ikun qiegħed jipprova jtejjeb il-kundizzjonijiet tal-għajxien f’żoni rurali jew l-ambjent u l-ekonomija rurali.
- Orizzont Ewropa huwa miftuħ ukoll għal korpi pubbliċi li jkunu qegħdin ifittxu li jinkoraġġixxu l-innovazzjoni u jtejbu s-servizzi pubbliċi.
- L-awtoritajiet lokali u reġjonali u ċerti korpi amministrattivi jistgħu japplikaw għal proġetti ffinanzjati taħt il-Faċilità Nikkollegaw l-Ewropa (CEF)
- Il-korpi pubbliċi jistgħu jaġixxu bħala awtoritajiet kontraenti għal opportunitajiet ta’ finanzjament fil-qasam tal-iżvilupp. Dejjem skont il-programm, korpi bħal dawn jistgħu wkoll jipparteċipaw f’sejħiet għall-proposti sabiex jirċievu għotja taħt l-azzjoni esterna tal-UE.
- L-aġenziji tal-għajnuna jistgħu jibbenefikaw minn finanzjament għal għajnuna umanitarja taħt programmi mmaniġġjati mid-dipartiment tal-Kummissjoni għall-Għajnuna Umanitarja u l-Protezzjoni Ċivili (ECHO). Barra minn hekk, il-korpi pubbliċi jistgħu jirċievu finanzjament għall-protezzjoni ċivili taħt il-komponenti tal-programmi dwar il-prevenzjoni/it-tħejjija u r-rispons.
- Il-Eurostat jippubblika sejħiet għall-proposti miftuħin għall-istituti nazzjonali tal-istatistika u awtoritajiet nazzjonali oħrajn responsabbli għall-ġbir/produzzjoni u l-pubblikazzjoni ta’ statistika uffiċjali. Dawn il-korpi jistgħu jibbenefikaw minn għotjiet taħt il-Programm Ewropew tal-Istatistika.
- Huma disponibbli finanzjament u assistenza teknika permezz tal-istrument ta’ Assistenza Teknika u Skambju ta’ Informazzjoni (TAIEX), Sigma u l-Ġemellaġġi.
- Il-Fond Ewropew għall-Affarijiet Marittimi, is-Sajd u l-Akkwakultura (EMFAF) jagħti lill-korpi pubbliċi għajnuna sostanzjali fil-ġbir tad-data u f’attivitajiet ta’ kontroll. L-EMFAF jappoġġja wkoll it-tfassil, l-iżvilupp, il-monitoraġġ, l-evalwazzjoni u l-ġestjoni tas-sistemi tagħhom għall-allokazzjoni ta’ opportunitajiet ta’ sajd.
- L-amministrazzjonijiet nazzjonali tad-dwana u t-taxxa jistgħu jibbenefikaw minn finanzjament taħt il-programmi Dwana u Fiscalis.
- Il-programm LIFE għall-azzjoni klimatika jipprovdi għadd ta’ opportunitajiet ta’ finanzjament li huma miftuħin għall-korpi pubbliċi.
- Il-korpi pubbliċi jistgħu japplikaw ukoll għal proġetti taħt il-programm dwar iċ-Ċittadini, l-Ugwaljanza, id-Drittijiet u l-Valuri.
- Il-korpi pubbliċi jistgħu japplikaw għal proġetti ffinanzjati mill-Aġenzija Eżekuttiva Ewropea għas-Saħħa u għall-Qasam Diġitali (HaDEA).
- Huma disponibbli opportunitajiet speċifiċi ta’ finanzjament għall-ibliet